Monthly Archives: Febreiro 2017

Profesorado das Revoltas entroidando a través da Historia

Estándar

Deixámosvos aquí para contaxiarvos o espírito entroideiro das Revoltas este video no que participou profesorado de todas as etapas do centro que acompañou a Pepiña e a Mafalda no seu percurso pola Historia. Calquera motivo festivo se pode tratar desde a temática do PDI deste curso: as etapas históricas, e con este simpático video quixemos contribuír a crear un Entroido Histórico.

Advertisements

Manifesto da AELG no Día de Rosalía

Estándar

Manifesto

da Asociación de Escritoras e Escritores en Lingua Galega (AELG)

no Día de Rosalía de Castro 2017

En Galicia existen infinitas formas de amencer: abrente, alborada, clarexa, luzada, rompente. A lírica que abraza os versos de Rosalía posúe as cores reveladoras da primeira luz.

Imaxino a Rosalía no século XIX e vexo unha muller que se aferra ás palabras sen complexos e fai con elas o que o corazón lle pide ao oído en cada instante: fitas de encaixe, diamantes, armas de construción masiva ou versos predestinados a furar as conciencias e facer cambalear os piares do inmobilismo.

Esa é ela. Unha xigante que non precisa respiración asistida, nin prantos, nin ritos florais. Os pulmóns da súa obra aférranse ao futuro e ínflanse coa forza dun país que respira cultura por cada fenda.

En Galicia existen infinitas formas de querer e nós querémoste paxaro, lume, emoción. Querémoste eléctrica e lúa. Insubmisa e valente. A voz que hoxe portaría unha pancarta na cabeza dunha manifestación contra a violencia machista ao berro de: Basta xa, querémonos vivas! A que quedaría afónica de solicitar, día tras día, unha maior presenza do galego na escola, na rúa, na vida. Na Galicia nosa que se estremece por momentos.

Imaxino a Rosalía e véxoa afirmando: Son muller e son galega. Reivindícome como escritora na miña propia lingua e non consinto que ninguén apague a miña voz. Estou tan viva que os meus versos rabuñan as paredes do panteón de galegas ilustres ata facelas sangrar. Négome a ser unha estranxeira exiliada na miña patria. Quero abarcar toda a luz e contaxiarte.

En Galicia existen infinitas formas de chover,

Como chove miudiño,

como miudiño chove,

pola banda de Laíño,

pola banda de Lestrove.

E con esa maxia pronuncio: babuxa, chuvisca, poalla, chuvieira, barruzo, dioivo. A lírica que arroupa os versos de Rosalía é un bico anfibio. Debaixo da auga nada a pracer, presumindo das súas branquias. Fóra dela, quita o traxe de escamas, mete as mans na terra e arrinca un libro e unha flor. Esa coa que hoxe queremos agasallar ao mundo. RosalíaTe!

Ledicia Costas

Asociación de Escritoras e Escritores en Lingua Galega (AELG)

DÍA DE ROSALÍA en 4º A ESO. Manequin challenge de Miña Santiña.

Estándar

Hoxe deixámosvos o video do manequin challenge que realizaron as alumnas de 4º A da ESO para participar na convocatoria da Asociación de Escritores/as en Lingua Galega que nos animou a conmemorar o Día máis rosaliano do ano turrandopola creatividade dos noso alumnado. Aquí vai a nosa contribución a representar o poema “Miña Santiña” de Cantares Gallegos.